बेलायत पढ्न आएका नेपाली विद्यार्थी तेस्रो मुलुकमा विस्थापित

गत वर्ष बेलायत सरकारले लागू गरेको टियर फोर भिसाअन्तरर्गत बेलायत आएका हजारौं नेपाली विद्यार्थी तेस्रो मुलुकमा विस्तापित हुन थालेका छन्। सरकारले हालै जारी गरेको भिसासम्बन्धी कडा नियमले सयौं निजी कलेज बन्द हुने र बिद्यार्थीको काम गर्ने अधिकार खोसिएपछि गैरकानुनी रुपमा विद्यार्थीहरु फ्रान्स, स्पेन, पोर्चुगल, फिन्डल्याड, नेदरल्यण्ड र बेल्जियम लगायतका देशमा जान थालेका छन्।
फ्रान्सको सैन्य सेवामा भर्ती हुने र पोर्चुगलमा स्थायी बसोबासको भिसा पाइन्छ भन्ने लोभमा विद्यार्थीहरुको युरोपतिर ओइरो लागेको हो। गइसकेका विद्यार्थीहरुले त्यहाँको सरकार समक्ष शरणर्थी भई बस्न पाउँ भनी आवेदन दिने गरेका छन्। बेलायतबाट युरोपका अन्य देशमा जादाँ विद्यार्थीहरुले दुई वटा बाटो प्रयोग गरेको भेटिएको अधिकारीहरुले बताएका छन्।
अधिकांश विद्यार्थीहरु विदा मनाउन जाने भनेर सेनजेन भिसा लिएर छिरेका छन् भने केही विद्यार्थी लरीमा चढेर ज्यानको खतरा मोल्दै छिरेका छन्। युरोपका विभिन्न सपिङ महलमा सामान ओसार्ने हजारौं टन समान बोकेर जाने ठूल्ठूला लरीमा लुकिछिपी जाने गरेका हुन्। यसरी जादाँ पाँच सय पाउण्डदेखि दुई हजार पाउण्डसम्म उनीहरुले तिरेको भेटिएको छ।
गैरअवासीय नेपाली संघ पोर्चुगलका पूर्व अध्यक्ष तथा आइसीसी सदस्य पूर्ण हमालले बेलायतबाट विद्यार्थीहरु हल्लै हल्लाको भर पोर्चुगल छिरेको बताए। 'सयौं विद्यार्थी सेनजेन भिसा लिएर यहाँ आएका छन् तर उनीहरुले सोचेजस्तो पोर्चुगल छैन', हमालले भने।
यसै गरी गैरआवासीय नेपाली संघ अन्तर्राष्ट्रिय परिषद् स्पेनका सदस्य पुष्पराज तिमिल्सिनाले स्पेनको हरेक सहरमा बेलायतबाट आएका विद्यार्थी रहेको बताए। हरेक दिन समूह-समूह बनाएर स्पेन छिरेका छन्। कति आए भन्ने तथ्यांक नभएको तिमिल्सिनाले बताए। उनले भने 'तीन वर्षमा यहाँको स्थायी बासिन्दा भइन्छ भन्ने सोचर आएका छन्। तर, भनेजस्तो सजिलो छैन काम पाउन निकै मुस्किल छ। लाखौं ऋण लिएर स्पेन आउनु गलत हो, आइसकेकाले काम पाएका छैनन् । खाने बस्नेमात्र भएको छ।'
स्पेन आउने भए तीन वर्षको आफ्नै खर्च लिएर आए हुन्छ त्यसपछि स्थाई बासोबास गर्ने भिसा बनेपछि काम पाउँछ, तिमिल्सिनाले भने, 'गैरकानुनी रुपमा आउनेलाई स्पेनका काम गर्ने अधिकार हुँदैन।'
यता बेलायतमा विद्यार्थीलाई कलेज सञ्चालकले आउने वर्षको शुल्क अहिले नै बुझाउन दबाब दिएपछि बाध्य भएर वैकल्पिक बाटो रोज्नु परेको विद्यार्थीहरु बताउँछन् । लण्डन कलेज अफ इन्जिनियरिङमा अध्ययनरत सुशील खत्रीले नेपाल जानुभन्दा अर्को विकल्प खोज्नु नै राम्रो हुने बताए। बेलायतमा काम पाउने अवस्था छैन, काम नभएपछि के खाने कहाँ बस्ने? कलेजले सधैं पैसामात्र माग्छ, नेपाल जाउँ भने दश लाख ऋण छ, साहु घरको ढोका कुरेर बसेका छन्। अब के गर्नु, यो मर्नुभन्दा बहुलाउनु निको भनेजस्तै हो खत्रीले भने।
बोस्टन कलेज अफ लण्डनका निर्देशक पामेश भट्टराईले केही विद्यार्थी पोर्चुगल गएको बताए। उनीहरु सेनजेन भिसामा गएका हुन्। तर त्यहाँ गएपछिको अवस्था कस्तो छ भन्न सकिन्न, 'उनले भने- अहिले प्रायः सबै कलेजमा छुट्टी छ। कलेज खुलेपछि कति विद्यार्थी फर्किन्छन भन्ने ठेगान छैन।' विद्यार्थी कलेजमा पढ्न आउने क्रम ५० प्रतिशतले कमी आएको छ, भट्टराईले भने, अन्तर्राष्ट्रिय विद्यार्थी आउने क्रम ९५ प्रतिशतले कमी आएको छ।'
साभार : नागरिक न्युज